David Vázquez (Pinancho)

Un namorado desta terra, aínda que estudou fóra, e podía traballar lonxe de aquí, sempre soubo que o seu destino era Chantada e a súa comarca. Aquí cámara ó lombo percorreu case tódolos camiños dende o Faro ata o Miño. Tamén é contador de historias, ou máis ben, transmisor de casos reais a través dos seus documentais, que como non, están a maioría gravados nestas terras.
	É un home da ribeira, por iso gusta de traballar nela, e saborear os grandes viños de Pesqueiras, San Fiz ou Sobrecedo.  Séntese afortunado de vivir nun sitio tan fermoso. Dí que hai que coidalo moito, xa que, "nós ímonos, e isto queda aquí para os nosos fillos, e netos...".